Minister's welcome in Māori

Nau mai ki www.localcouncils.govt.nz

He mihi atu tēnei nāku, nā te Minita mō Te Kāwanatanga ā-rohe, ki a koutou katoa. Ko taku hiahia kia whakapikia te māramatanga o te iwi whānui ki ngā mahi nunui e pīkauria nei e ō tātou kaunihera kāwana ā-rohe me ōna kawenga, me kore e kaha ake te whakauru mai o te tangata ki ngā whiriwhiringa me ngā tikanga whakatau take o te kāwanatanga ā-rohe huri noa.

Ka pā te kāwanatanga ā-rohe ki tō tātou oranga ia rā, he wāhi nui tonu hoki tōna ki ngā mahi hanga hapori pakari tonu. Huia katoatia, ka eke ngā mahi a ngā kaunihera ā-rohe ki tētahi 3 ōrau o ngā mahi o te ōhanga o Aotearoa.

Ka riro mā tō kaunihera ā-rohe e whakapūmau te oranga o te takiwā, me ngā tino mahi nunui mō ngā rohe pēnei i te ārai koiora kino, i ngā whakahaere aituā whawhati tata, i ngā mahi kawe tangata puta noa i te rohe, me te whakahaere rawa whenua, rawa moana.

Ka riro hoki mā tō tāone e whakahaere te oranga o te iwi me te whakapakaritanga hapori, te urupare ki ngā aituā whawhati tata me te taiao, ngā rori me ngā mahi kawe tangata, ngā pūnaha parakaingaki, te wai me te wai rere i ngā āwhā. Ko tō tāone hoki kei te whakahaere i ngā take hauora mō te iwi whānui me ngā tikanga whakahaumaru i te tangata (ngā mahi whakarite tikanga hanga whare, i ngā mahi ngahau, me te whakahaere rawa whenua, rawa moana (tae atu ki ngā whakamaheretanga whakamahi whenua me ngā whakahaere whanaketanga).

Ka whiriwhiri tikanga tēnā kaunihera, tēnā kaunihera mō tōna hapori, i runga anō i ngā āhuatanga rerekē, ngā āhuatanga motuhake tonu – te āhua o te takiwā, te rahi me te tere o te whanaketanga me ngā mahi whakapakari, ngā āhuatanga rerekē o te taiao me ōna whakamahinga, koia ēnei ētahi o ngā whiriwhiringa. Ka whiriwhiri tikanga hoki me pēhea e kaha ake ai te mahi tahi.

I tēnei pae tukutuku, ka kitea he kōrero mō ngā mahi a te kāwanatanga ā-rohe i tēnā takiwā, i tēnā takiwā mō ōna tāngata huri noa i te whenua. Ko te whāinga nui, kia whakamōhiotia koe mō ngā āhuatanga o ngā mahi o tō kaunihera i waenga i ngā mahi kāwana ā-rohe whānui tonu, hei tautoko hoki i ngā pārongo e horaina ana e tō kaunihera ki a koe.

Ko tāku he akiaki i a koutou kia mahi tahi me ō koutou kaunihera, nā te mea ka whai pānga ā rātou mahi ki a koutou me te oranga o ā tātou tamariki mokopuna.